Biogram
Józef Bùdzysz ùrodzył sã 8 gromicznika 1909 rokù w Pùckù w rëbacczi familie, jakô bëła rodã z Chalëp na Hélsczim Półòstrowie. Òjc Józefa, Antón, w 1908 rokù kupił zemiã niedalek hôwindżi w Pùckù razã z môłą rëbacką chëczą ë wãdzarnią.W latach 1915-18 Bùdzyszowie w môlu stôrégò bùdinkù wëbùdowalë dwãpiãtrową kamienicã.
Józef ë jegò bracynowie bëlë wëchòwiwóny na rëbôków. Razã łowilë a òb lato zarôbialë ekstra na wòżenim bôtama letników na Hél ë do Gdinie.
II swiatowô wòjna zmieniła żëcé Józefa – jak jinszi mieszkańcowie Pòmòrza béł òn mocą wzãti do niemiecczégò wòjska. Czej wòjna sã skùńcza wrócył do rëbaczeniô, równak w 1950 rokù kòmùnyscë wzãlë mù rëbôcką kôrtã. Tej zaczął robòtã w Rëbny Centralë jakno robòtnik a pózni jinszpektór kwalitetu rib. Chòc w 1956 rokù dostôł nazôd rëbôcką kôrtã, tej ju nie wrócył do łowieniô.
Krótkò robił w państwòwëch rëbnëch firmach Arka w Gdinie ë Szkuner we Wiôldżi Wsy. Wrócył téż do swòjégò hòbbi z młodëch lat – czej miôł czas rëchtowôł mòdele rëbacczich bôtów ë preparowôł rëbë. Tak pòwikszałë sã jegò zbiorë, jaczé rôd pòkazywôł blësczim. To prawie òni pòdskacëlë gò, żebë w swòji chëczi zrëchtowôł wëstawã. Pòzwôł jã Môłé Rëbacczé Mùzeùm. Nie je wiedzec, czedë bëło òno òtemkłé. Jegò zakłôdca pòdôwôł lata 1954-1955. Z czasã wëszło, że bëło to pierszé para-mùzeùm na wschòdnim Pòmòrzim.
W 1969 rokù Józef Bùdzysz dostôł zgòdã na prowadzenié w swòjim dodomù smażalnie rib, jaką pòzwôł Chëcz Kaszubska. Tak tej do kùńca żëcégò zajimôł sã gastronomią a mùzeùm, w jaczim rozkòsérzôł wiédzã ò kaszëbsczim rëbaczenim.
Za swòjã robòtã kòl piastowaniô rëbaczich tradicjów a kaszëbsczi kùlturë dostôł wiele nôdgrodów. Ùmarł 11 lëpińca 1992 rokù, pòchòwóny je w Pùckù.
